رخ پاکستان: سابق وزیرِاعظم اور مسلم لیگ (ن) کے صدر میاں محمد نواز شریف گزشتہ روز لاہور سے لندن روانہ ہو گئے ہیں۔ وہ قطر ایئرویز کی پرواز کے ذریعے علامہ اقبال انٹرنیشنل ایئرپورٹ سے روانہ ہوئے۔
خاندانی ذرائع کا کہنا ہے کہ نواز شریف کا یہ دورہ تقریباً دو ہفتوں پر محیط ہوگا جس کا بنیادی مقصد صرف اور صرف طبی معائنہ ہے۔ ان کا سیاسی سرگرمیوں میں حصہ لینے کا کوئی ارادہ نہیں تاہم اگر پارٹی کے کچھ رہنما یا کارکن ملاقات کے لیے آئیں گے تو وہ ان سے ضرور ملیں گے، لیکن کسی قسم کی باضابطہ سیاسی ملاقات شیڈول میں شامل نہیں ہے۔
نواز شریف کی یہ روانگی ان کی صحت سے جڑی ضروریات کے تحت ہو رہی ہے۔ حال ہی میں وہ لاہور میں پنجاب انسٹی ٹیوٹ آف نیوروسائنسز میں چیک اپ کے لیے گئے تھے جہاں ان کی گردن کا ایم آر آئی ہوا تھا۔ رپورٹ میں گردن کے پٹھوں میں کھنچاؤ اور درد کی شکایت سامنے آئی تھی۔
لندن میں وہ دل کی بیماری، خون کی کمی اور عمر سے جڑے دیگر مسائل کے حوالے سے مزید طبی معائنے کروائیں گے۔ وہ حسبِ معمول ہارلے اسٹریٹ کلینک جائیں گے جہاں ان کے ذاتی معالج ڈاکٹر عدنان بھی موجود ہوں گے۔
یاد رہے کہ نواز شریف اس سے پہلے جون 2025 میں بھی لندن گئے تھے جہاں انہوں نے عیدالاضحیٰ منائی اور طبی معائنہ کروایا۔ اس دورے کے دوران وہ 18 جون کو پاکستان واپس آئے تھے۔
