رخ پاکستان: وزیراعلیٰ پنجاب مریم نواز کا طلبہ سے خطاب “میرٹ پر لیپ ٹاپ اور اسکالرشپس تعلیم کے ذریعے خوابوں کی تعبیر ممکن“
چکوال یونیورسٹی میں ایک پروقار تقریب کے دوران، وزیراعلیٰ پنجاب مریم نواز شریف نے لیپ ٹاپ اور ہونہار اسکالرشپ اسکیم کے تحت نمایاں کارکردگی دکھانے والے طلبہ میں اعزازات تقسیم کیے۔ اس موقع پر انہوں نے طلبہ کو مبارکباد دیتے ہوئے کہا کہ حکومت پنجاب نوجوانوں کو تعلیم کے میدان میں ہر ممکن سہولت فراہم کر رہی ہے تاکہ وہ اپنے خوابوں کو حقیقت میں بدل سکیں۔
انہوں نے بتایا کہ رواں سال پنجاب بھر کے 1,25,000 ہونہار طلبہ کو لیپ ٹاپ دیے جائیں گے، جب کہ اسکالرشپس کی تعداد بھی بڑھا دی گئی ہے جو پچھلے سال 30 ہزار تھیں، اب انہیں بڑھا کر 50 ہزار کر دیا گیا ہے، اور اس میں مزید اضافے کا اعلان بھی کیا گیا ہے، جس کے بعد 80 ہزار طلبہ اسکالرشپ سے مستفید ہوں گے۔
مریم نواز کا کہنا تھا کہ یہ تمام سہولتیں مکمل طور پر میرٹ کی بنیاد پر فراہم کی جا رہی ہیں اور پنجاب حکومت اس بات کو یقینی بنا رہی ہے کہ کوئی بھی طالب علم صرف وسائل کی کمی کے باعث تعلیم سے محروم نہ رہ جائے۔ انہوں نے طلبہ کو حوصلہ دیتے ہوئے کہا کہ وہ بڑے خواب دیکھیں کیونکہ حکومت ان کے خوابوں کی تعبیر کے لیے ہر قدم پر ان کے ساتھ ہے۔
خطاب کے دوران، وزیراعلیٰ نے حالیہ سیلاب کا بھی ذکر کیا جسے انہوں نے پنجاب کی تاریخ کا سب سے شدید سیلاب قرار دیا۔ انہوں نے اس مسئلے پر سیاست کرنے کے رویے پر افسوس کا اظہار کرتے ہوئے کہا کہ اس طرح کے نازک وقت میں سیاست کی بجائے متحد ہو کر متاثرین کی مدد ہونی چاہیے۔
امن و امان کی صورتحال پر بات کرتے ہوئے انہوں نے کہا کہ جب انہوں نے حکومت سنبھالی تو پنجاب میں سیکیورٹی کے مسائل نمایاں تھے، لیکن اب صورتحال میں نمایاں بہتری آ چکی ہے۔ خاص طور پر کرائم کنٹرول ڈپارٹمنٹ (CCD) کے قیام کے بعد 26 اضلاع میں جرائم کی شرح نہ ہونے کے برابر ہو چکی ہے۔
اختتام پر مریم نواز نے اس عزم کا اعادہ کیا کہ وہ پنجاب کو ایک محفوظ، پر امن اور ترقی یافتہ صوبہ بنا کر دم لیں گی۔ ان کا کہنا تھا کہ ایک خوشحال، تعلیم یافتہ اور محفوظ پنجاب میرا خواب ہے، اور ہم سب کو مل کر اسے حقیقت بنانا ہے۔
