غزہ:اسرائیلی فوج کا فلسطینی خیموں پر حملہ، 18 فلسطینی زندہ جل کر شہید
الجزیرہ کی رپورٹ کے مطابق اسرائیلی فوج نے ایک محفوظ علاقے پر بمباری کی جس سے خیموں میں رہائش پذیر 18 فلسطینی زندہ جل کر شہید ہوگئے۔ جبکہ اکثریت بمباری کے بعد خیموں میں آگ لگنے کے باعث شہید ہوئے۔
رپورٹ میں کہا گیا کہ اسرائیلی طیاروں نے جبالیہ پناہ گزین کیمپ پر بھی حملہ کیا جس کے نتیجے میں کئی افراد ہلاک ہوئے۔ اسرائیلی فوج نے بیت حنون سے بے گھر ہونے والے فلسطینیوں کو انخلا کا حکم بھی دے دیا ہے۔
اس کے علاوہ فلسطینی مزاحمت کاروں نے رفح میں اسرائیلی ٹینکوں کو نشانہ بنایا۔ جنوبی لبنان میں اسرائیلی طیاروں نے حزب اللہ کے ٹھکانوں پر حملہ کیا جس میں ایک حزب اللہ فائٹر مارا گیا۔
یاد رہے کہ اکتوبر سے غزہ پر جاری اسرائیلی حملوں میں اب تک تقریباً 40 ہزار فلسطینی شہید ہو چکے ہیں جن میں خواتین اور بچوں کی بڑی تعداد شامل ہے۔
