بھارت: ڈاکٹروں نے 70 سالہ بزرگ کے پتے سے 6 ہزار سے زائد پتھر نکال لیے

راجستھان کے کوٹا علاقے میں ڈاکٹروں نے ایک 70 سالہ بزرگ کے پتے سے 6,110 پتھر نکالے ہیں۔

پچھلے ڈیڑھ سال سے بزرگ کو معدے میں درد، گیس، اور متلی کی شکایات تھیں جس کے باعث انہوں نے کوٹا کے ایک نجی ہسپتال میں علاج کروایا۔ ڈاکٹروں نے آپریشن کا مشورہ دیا۔

تفصیلات کے مطابق 6 ستمبر کو بزرگ کے پتے کا معائنہ کیا گیا تو معلوم ہوا کہ ان کا پتہ بہت بڑا ہو گیا ہے اور پتھروں سے بھر گیا ہے، جس کی وجہ سے انہیں درد ہو رہا تھا۔ ڈاکٹروں نے بتایا کہ پتے کا معمول کا سائز 7×4 سینٹی میٹر ہوتا ہے لیکن بزرگ کے پتے کا سائز 12×4 سینٹی میٹر تھا اور اگر آپریشن کے دوران پتے میں سوراخ ہو جاتا، تو پتھر پورے پیٹ میں پھیل سکتے تھے، جس سے انفیکشن کا خطرہ بڑھ جاتا۔

ڈاکٹر دنیش جندال نے بتایا کہ انڈوبیگ کے ذریعے پتہ نکالا گیا جس میں تقریباً 30 سے 40 منٹ لگے۔ آپریشن کے بعد پتہ چلا کہ پتے میں بہت سارے پتھر موجود تھے۔

بزرگ کو آپریشن کے بعد اسپتال سے ڈسچارج کر دیا گیا۔ ڈاکٹر دنیش جندال نے کہا کہ انہوں نے اس سے پہلے ایک 45 سالہ مریض کے پتے سے 5,070 پتھر نکالے تھے، اور ایک اور 70 سالہ بزرگ کے پتے سے 8×4 سینٹی میٹر کے پتھر نکالے تھے۔