ہمارے 6 سے 7 بچے ہیں،فنکار جوڑی آریز احمد اور حبا بخاری نے افواہوں کی تردید کردی

پاکستان کی مشہور اداکار جوڑی آریز احمد اور حبا بخاری نے اپنے متوقع بچے کی پیدائش کے بارے میں سوشل میڈیا پر چلنے والی خبروں پر اپنا ردعمل دیا ہے۔

ایک وی لاگ میں انہوں نے کہا کہ اگر سوشل میڈیا کی باتوں پر یقین کیا جائے تو ان کے پہلے سے 6 یا 7 بچے ہیں۔ انہوں نے بتایا کہ کچھ لوگ چند ویوز اور لائکس حاصل کرنے کے لیے ایسی خبریں پھیلانے کا سستا طریقہ اپناتے ہیں۔

مزید پڑھیں: معروف گلوکارہ آئمہ بیگ کو پاکستانی عرفی جاوید قرار دے دیا گیا

آریز اور حبا نے کہا کہ سوشل میڈیا پر حقائق کو غلط انداز میں پیش کرنے والے یہ نہیں سوچتے کہ ان کی باتوں سے متاثر ہونے والوں خاص طور پر ان کے خاندان پر کیا اثر ہوگا۔ حبا نے کہا کہ انہوں نے کئی بار ایسی افواہوں کی تردید کی ہے لیکن بعض لوگ باز نہیں آتے۔

انہوں نے مزید کہا کہ افواہیں پھیلانے والوں کو سوچنا چاہیے کہ اخلاقیات بھی کوئی چیز ہوتی ہیں، کیونکہ ایسی خبریں لوگوں کو متاثر کر سکتی ہیں۔

واضح رہے کہ پاکستانی اداکارہ نادیہ خان نے حال ہی میں آریز اور حبا کو متوقع بچے کی پیدائش کی مبارکباد دی تھی۔ انہوں نے یہ بھی بتایا کہ آریز نے انہیں ڈرامے کی شوٹنگ کے دوران اپنی اہلیہ کی امید سے ہونے کی خبر دی تھی لیکن انہیں نہیں معلوم تھا کہ یہ جوڑی اس خبر کو خفیہ رکھنا چاہتی ہے۔