رخ پاکستان: ٹک ٹاک ایک مقبول سوشل میڈیا ایپ ہے جس نے حالیہ برسوں میں بے حد شہرت حاصل کی ہے۔ 2021 میں اس ایپ کے ماہانہ صارفین کی تعداد ایک ارب تک پہنچ گئی تھی، اور کئی نوجوانوں نے اس کے ذریعے شہرت حاصل کرنے کے ساتھ ساتھ پیسے بھی کمائے۔ حیرت کی بات یہ ہے کہ ٹک ٹاک سے کمانے کے لیے آپ کو لاکھوں فالوورز کی ضرورت نہیں ہوتی۔ کم فالوورز والے افراد بھی اس پلیٹ فارم سے آمدنی حاصل کر سکتے ہیں۔
مزید پڑھیں: یوٹیوب سے لاکھوں کمائیں، نیا فیچر ’جیولز‘ متعارف کروا دیا گیا
ٹک ٹاک نے صارفین کے لیے مختلف پروگرامز متعارف کروائے ہیں جن کے ذریعے آمدنی ممکن ہے، جیسے کریئیٹر ریوارڈز پروگرام، سبسکرپشن، ویڈیو گفٹ، اور دیگر۔ ہر پروگرام کے لیے مخصوص شرائط ہوتی ہیں۔ مثال کے طور پر، کریئیٹر ریوارڈز پروگرام میں شامل ہونے کے لیے آپ کی عمر کم از کم 18 سال ہونی چاہیے، 10 ہزار فالوورز ہونے چاہئیں، اور گزشتہ 30 دن کے دوران آپ کی ویڈیوز پر ایک لاکھ ویوز حاصل کیے جانے ضروری ہیں۔ تاہم، یہ پروگرام فی الحال پاکستان میں دستیاب نہیں ہے اور صرف امریکہ، برطانیہ، جرمنی، جاپان، جنوبی کوریا، فرانس، اور برازیل میں فعال ہے۔
پاکستان میں صارفین کے لیے دستیاب ایک اور آپشن سبسکرپشن پروگرام ہے، جو صارفین کو اپنی ویڈیوز سبسکرائب کروا کر کمانے کا موقع فراہم کرتا ہے۔ اس پروگرام کے لیے آپ کے پاس کم از کم 10 ہزار فالوورز ہونے چاہئیں، ایک سال کے دوران آپ کی ویڈیوز پر ایک لاکھ ویوز حاصل کیے گئے ہوں، اور آپ کی عمر 18 سال یا اس سے زیادہ ہونی چاہیے۔
اسی طرح ویڈیو گفٹ فیچر پاکستان سمیت دنیا بھر میں دستیاب ہے، جہاں آپ اپنی ویڈیوز دیکھنے والے افراد سے گفٹس حاصل کر سکتے ہیں۔ اس کے لیے شرط یہ ہے کہ آپ کی عمر 18 سال ہو، آپ کے پاس 10 ہزار فالوورز ہوں، اور آپ کا اکاؤنٹ کم از کم 30 دن پرانا ہو۔ اس کے علاوہ، گزشتہ 30 دن کے دوران کم از کم ایک پبلک ویڈیو پوسٹ کرنا ضروری ہے۔
ٹک ٹاک نے برانڈ اشتہارات کے لیے کریئیٹو چیلنج بھی متعارف کرایا ہے، جہاں آپ برانڈز کے ساتھ شراکت داری کر کے کما سکتے ہیں۔ اس پروگرام میں شمولیت کے لیے آپ کے پاس 50 ہزار فالوورز ہونا ضروری ہے۔ اس کے علاوہ ٹک ٹاک سیریز پروگرام کے ذریعے آپ اپنی ویڈیوز کو ایک البم کی صورت میں ترتیب دے کر ان تک رسائی پیسوں کے عوض فراہم کر سکتے ہیں۔ اس کے لیے اکاؤنٹ 30 دن پرانا ہونا، 10 ہزار فالوورز ہونا، اور ویڈیوز کا اوریجنل ہونا ضروری ہے۔
ٹک ٹاک کے یہ پروگرامز صارفین کو مختلف طریقوں سے کمانے کے مواقع فراہم کرتے ہیں، لیکن ہر پروگرام میں شامل ہونے کے لیے ضروری شرائط کو پورا کرنا لازمی ہے۔ یہ پلیٹ فارم نہ صرف تفریح بلکہ آمدنی کا ایک اہم ذریعہ بن چکا ہے، خاص طور پر نوجوانوں کے لیے۔
