رخ پاکستان: سویڈن نے اعلان کیا ہے کہ وہ 9 اپریل 2025 سے پاکستانی شہریوں کے لیے ویزا درخواستوں پر دوبارہ کام شروع کر دے گا۔
یہ بھی پڑھیں: فولڈ ایبل آئی فون متعارف، قیمت اور فیچرز جانیئے
اسلام آباد میں سویڈن کے سفارتخانے نے اس بات کی تصدیق کی ہے کہ اب پاکستانی شہریوں کو کام، تعلیم یا خاندان کے ساتھ دوبارہ ملنے کے لیے سویڈش ویزا کے لیے درخواست دینے کے سلسلے میں مقامی سطح پر سہولت دی جائے گی۔ اس سے قبل انہیں ان معاملات کے لیے ایتھوپیا کے شہر ادیس ابابا جانا پڑتا تھا، جو خاص طور پر طلبہ کے لیے ایک بڑا مسئلہ تھا۔
اب اسلام آباد میں ہی درخواست جمع کروانے، بائیومیٹرک ڈیٹا دینے، پاسپورٹ کی تصدیق اور انٹرویو کا عمل مکمل کیا جا سکے گا۔ یہ قدم 2023 میں ویزا سروسز کی معطلی سے پیدا ہونے والے مسائل کو حل کرنے اور زیر التوا درخواستوں کا بوجھ کم کرنے کے لیے اٹھایا گیا ہے۔
سویڈن کے سفارتخانے کا کہنا ہے کہ اس فیصلے کا مقصد طلباء، ہنر مند افراد اور ان لوگوں کے لیے سہولت پیدا کرنا ہے جو اپنے خاندان سے دوبارہ ملنا چاہتے ہیں۔
قلیل مدتی شینگن ویزا کے لیے درخواستیں بدستور وی ایف ایس گلوبل دفاتر کے ذریعے جمع کی جائیں گی، جبکہ طویل مدتی ویزا جیسے تعلیم، کام یا رہائش کے لیے اب تمام مراحل اسلام آباد میں ہی مکمل ہوں گے۔
اس فیصلے سے پاکستانیوں کے لیے سویڈن میں تعلیم اور ملازمت کے مواقع حاصل کرنے کا عمل مزید آسان اور قابل رسائی ہو جائے گا۔
