رخ پاکستان: کابینہ ڈویژن نے سال 2025 کی پہلی ششماہی، یعنی یکم جنوری سے 30 جون تک کے توشہ خانہ کے تحائف کی تفصیلات جاری کر دی ہیں، جس میں بتایا گیا ہے کہ مختلف اعلیٰ سرکاری شخصیات کو اس عرصے میں کون سے تحائف موصول ہوئے۔
اس فہرست میں صدرِ مملکت، وزیراعظم، وزرائے اعلیٰ، نائب وزیراعظم، وزیر داخلہ، تینوں مسلح افواج کے سربراہان اور دیگر اہم شخصیات شامل ہیں۔ خوش آئند بات یہ ہے کہ موصول ہونے والے تمام تحائف باقاعدہ طور پر توشہ خانہ میں جمع کروا دیے گئے ہیں۔
یہ بھی پڑھیں: سیلاب کی تازہ رپورٹ جاری، تقریبا 44 لاکھ افراد محفوظ مقامات پر منتقل
تحائف کی نوعیت عام اور رسمی تھی، جن میں سجاوٹ کی اشیا، قیمتی گھڑیاں، ہاتھ سے بنے قالین، جائے نماز، کافی سیٹ، روایتی کپ، کتابیں، ماڈل اشیا اور یہاں تک کہ ایک الیکٹرک گاڑی بھی شامل ہے۔
وزیراعظم شہباز شریف کو اس عرصے میں جو تحائف دیے گئے، ان میں دو گھڑیاں، منبرِ رسول ﷺ کا ماڈل، چند کتابیں، تین شیلڈز، فریم شدہ تصویر، ایک پلیٹ، لکڑی کا خوبصورت باکس، ہاتھ سے بنا ریشمی قالین، مراکش کا ماڈل، ایک ہاتھی کی شکل کی سجاوٹی چیز، یاک کا ماڈل، ہینڈ بیگ اور دیگر اشیاء شامل تھیں۔
صدرِ مملکت آصف علی زرداری کو بھی مختلف نوعیت کے تحائف موصول ہوئے، جن میں ایک کارپیٹ، کافی سیٹ، واز، ٹیبل کلاتھ، بیڈ شیٹ، لیڈیز سوٹ، ونڈ ٹربائن کا ماڈل، ایک پینٹنگ، پین اور کف لنک سیٹ، ایک شیلڈ اور ایک الیکٹرک گاڑی شامل ہیں۔
افواجِ پاکستان کے سربراہان کو بھی دیگر ممالک کی جانب سے تحائف دیے گئے۔ چیف آف آرمی اسٹاف جنرل عاصم منیر کو ترکیہ کے صدر کی جانب سے ایک ٹی سیٹ تحفے میں دیا گیا۔ ایئر چیف مارشل ظہیر احمد بابر سدھو کو کھانے کے برتن (ڈش آئٹم) ملا، جبکہ نیول چیف ایڈمرل نوید اشرف کو بھی ایک خوبصورت ٹی سیٹ بطور تحفہ دیا گیا۔
